日本七日遊及LIVE ACADEMY遠征感想紀錄
整理一下我近呢幾年去左幾多次日本先, 這次剛好是第十次了, 對日本已沒新鮮感, 亦慢慢失去了旅遊的衝動, 咁次去既主要目的, 睇奈奈同練習開車, 但其實行程上, 返番我以前去過日本既地方, 06年既和歌山, 08年名古屋, 同去過四次既大阪, 唔覺唔覺又浪費十年了.
上年11月係小試牛刀, 今次開足五日車, 共開左一千二百幾公里, 遇過大風, 大雪, 大霧, 大雨, 開過山谷, 田野, 夜車, 對於香港無車既我, 呢個經驗好難得, 我總算克服了. 呢次既奈奈LIVE算係我最享受既一場奈奈LIVE, 因為不用帶團, 又夠訓, 物販又排得唔辛苦, 又有車開唔駛周居勞頓, 總括來說呢次旅程都幾深刻.
DAY 1 (大阪, 雨)
第一次坐午機去日本, 感覺好好, 訓到十二點先出門, 去機場居然被我買到EYE COVER同耳塞, 又發現一碟干牛河70蚊, O哂咀, 其實都係900YEN姐, 1500起飛, 睇朱古力獎門人既日文版, 居然睇唔哂就落機, 飛大阪近過飛東京, 落機後去取車, 總算可以舒舒服服去旅行, 但無耐就落起雨了, 越落越大, 車頭玻璃越黎越模糊, 呢個時候我係高速中線, 唔好話左右鏡, 連玻璃既能見度到得番零, 又唔敢CUT線泊埋一邊, 又唔停得車前面又就黎矇都睇唔到野, 已經開左風的了, 冷氣暖氣都試過, 唯有叫助手席既人幫手抺我前面塊玻璃, 總算安全到達酒店.
呢間中央酒店我兩年前住過的, 當時住單人房都覺得佢大, 今次兩人房真係大得好緊要, 訓六個人都得, 每人2300YEN晚抵屌到暈, 我一早安排左D貨寄黎酒店的, D貨成三個大喼咁大, 之後拆箱REPACK, 好在間房夠大, 可以做工場.
安頓好大約2230左右, 友人P居然話開車去道頓堀食野, 是但啦, 開都出去人來人住, 做左第一件笨七既事, 去左一個有人代泊車既停車場, 特別貴的, 好彩只係泊左一個鐘, 去番五年前食過既金龍拉面, 個面都幾頹的, 但係果個時間都無乜選擇了, 食完開車返歸.
DAY 2 (和歌山, 雨)
今日無乜點影相, 一出門就落雨了, 而且幾大, 基本上今日既行程只有開車, 由大阪去勝浦有接近三百公里, 我之前準備既FM transimitter for ipod用唔到, 先達D仆街靠害的, 出發現開車去左yodobashi camera, 買左個係MP3都O岩用既, 成為二千YEN, 開長途無奈奈(既歌)陪會訓的, 話說上去yodobashi camera又笨七左, 有地下停車場唔入, 走左上八樓, 轉到頭暈, 搞掂哂出發去勝浦, 差唔多到勝浦既60公里路好似秋名山一樣, 天又齊, 完全無街燈, 條路又窄, 又有對頭車, 最得意既係唔開燈係到路都望唔到的, 一開高燈就成條路都睇到, 因為中線同防撞欄都有反光石, 又上山又落山, 維持左成個鐘鐘於到了, 搵停車場既時候發覺好多人泊街邊, 唔理了, 我又泊.
食完個好頹既自助餐, 去左浸溫泉, 雖然係可以望到太平洋, 媽媽乜都睇唔到, 淨係聽到D好近既浪聲, 好不安, 呢個係浸過之中最大硫磺味既温味, 浸完温泉飲可樂係人生一大快事, 昨晚訓得兩三個鐘, 今晚可以大覺訓了.
DAY 3 (名古屋, 晴)
今日由和歌山上名古屋, 預計要開五個鐘車, 今日終於天晴了, 圖片係由酒店房間影去對岸, 睇下我架違例泊車仲係唔係度, 真係ZOOM得到, 仲係度, 日本都外果然可以亂泊的XD.
開左無耐, 發現左個好大好大好外國FEEL既停車場連百貨公司, 估計有三千個車位, 機鋪, 戲院, UNI, M記等乜都有, 仲要係一座座獨位的, 唔係商場, 最離譜係有個超市, 我自出娘胎未見過咁大既超市, 一層長立形, 長度可能有600~800米, 好似維園六個足球場咁大, 好似呢個世界所有既野都有得賣咁.
今日開既路近海, 風景好好, 日本D路真係幾乾淨, 唔係淨係無垃圾, 係D線好清楚.
係呢D國道中途, 有好多叫'道之駅'既野, 即係中途休息站, 細既只有自動物販機同厠所, 大既有餐廳超市油站, 講開油站, 尋晚想入油時發現日本效區油站好早就收工, 但可以自己俾錢入油的, 但係我唔識入, 一陣佢唔停咁濆油就仆街了.
大約四點幾到名古屋, 酒店對面有間住宅, 門牌係鬼頭, 唔通日本有人姓鬼頭的? 阿邦佢地六點幾先到, 佢既運撚車(混能車)好正, 好先進咁, 又好慳油, 我果架食成倍油, 譚仔個日本電話唔通的, 於是我地去左周邊搵左既食'肝'的, 個WAITRESS係中國人, 叫左幾個煱, 唔太好食, 唔飽的, 早D返去抖, 明日晨早去排物鈑.
DAY 4 (名古屋, 晴)
一早比房間電話叫醒, 居然係譚仔, 佢搵到黎我酒店, 果時仲係四點, 拿拿臨疏洗, 叫醒D哂人就出發.
我隔離個導航教錯路, 遲左少少, 好似五點幾到, 去到會場發現周圍泊滿車, 兜左個圈發現會場停車場未開, 個個都泊街邊, 我當然泊街邊啦, 一落車發後面架車有田村兔同七仔, 田村兔真係好得意, 一早好冬, 但唔係好多人排, 前面有二三百人左右吧, 今次物販排得最舒服了, 無耐阿邦都到了, 佢問我泊係邊, 梗係街邊啦, 跟大圍無死的, 然後去便利店買左個早餐, 剛剛天光.
大約六七點, 發現有D人無端跑左出去, 原來停車場開, 好似遲D都會比抄牌咁, 又好似毎停車場無位咁, 駛乜跑呢..., 個停車場成兩三千個車位.
排得悶, 走左去前面睇下有乜睇, 發現我最愛既奈奈美紙版, 好似高過奈奈少少.
奈奈真係好野, 呢個年紀著校服都咁萌, 物販提早左成半個鐘開始, 唔駛一個鐘就入到去, 好順利, 大約十一點幾就搞掂哂, 然後我同阿邦兩架車都SET好GPS去名古屋位附近搵野食, 諗住我跟住佢架車會容易, 跟左唔夠十分鐘就見唔到佢尾燈了, 我過唔到燈位==, 去到站附近玩左好耐先泊到車, 可能係星期日, 人多車多, 食完飯各自行動, 我訓左陣等埋譚仔一齊出發.
返到會場個停車場都泊左八成車了, 早十五分鐘同阿邦入會場, 場入面同武道館差唔多, 但感覺少人過武道館, 我既位置普普通通, 無聊之際阿邦居然係茫茫人海發現C12, 真係好野, 遲左五分鐘開場, 今次係我第....10次睇奈奈LIVE, 整體評分係最高的, 開場用上SOUND HORIZON常用的半透明投射拉布, 舞台設計係相當有立體感既哈利波特式古堡, 因為這次以學校為主題, 奈奈既服裝十分讚, 奈奈當晚既狀態唔錯, 個SET LIST編排都幾好, 中場既YODA TEAM同CHERRY BOYS介紹好有新意, 無悶場, 特別係CHERRY BOYS首歌, 可以用黎出CD, 奈奈用幾條布帶吊到七樓咁高最驚險, ENCORE後有特大吹氣波波好歡樂, 致送紀念品又無搞咁耐, 但其實奈奈到後期都有D累了, 完場後W ENCORE左成七分鐘, 然後MISHI出黎講解之後既生放送, 今次一早知道有兩首歌係NHK現場放送的, 我以為係中間唔知邊兩首, 原來係最尾再加兩首(係我無做功課orz), MISHI主要講, 一陣全日本都會睇到我地奈迷的, 係代表奈迷, 所以唔好做一D唔適當既行為, 奈奈都好緊張, 大家要支持佢咁, 之後就有個NHK既女私儀出現, 我仲以為佢會被我地既熱情嚇親, 佢唔單只無, 仲將個氣氛推高, 過左無耐係大電視就見到NHK既節目, 奈奈出場, 同北乃紀伊講左兩句, 全日本都望住我地, 好興奮, 奈奈第一首高要用UP(粉紅色), 全場約七成都有用到, 係有D仆街用色突顯自己位置, 如果呢D仆街係我面前, 我真係驚會同佢搶UG, 好明顯唱左成晚既奈奈狀態麻麻, 但仍然全力獻唱, 完場有三件事要做的, 一件係獨有拍手鼓勵身邊既人(我唔記得日文叫乜野), 一件係同周圍既人講辛苦哂, 仲有一件係同身邊既人握手, 呢三件事雖然好似好多餘, 但我覺得要做的, 如果個個都咁做, 我會覺得成件事會有更深既意義, 大家係有種無形既連繋的
三個幾鐘, 過得奇快, 兩升既水幾乎吹哂, 出都去開車走人, 停車場條車龍都唔知邊度係龍尾, 奈奈迷好禮讓咁俾我插隊, 出都去又行左兩次掘頭路, 真係唔好意思, 大家又去食晚飯, 又係我跟阿邦車, 今次無走失了, 結果都係去左快餐店食, 有我最愛既溫泉蛋.
DAY 5 (京都, 陰)
忘了說一件事, 就係我個FM接收器經常JAM線, 收左隔離唔知邊架車播緊既歌, 有D係奈奈, 有D唔係, 乜歌都有, 原來日本都幾多人用果個野播歌.
起身後同阿邦道別, 又開始旅途, 今日車程係由名古屋>京都洛北>京都祇園>大阪, 途中經過一條好明顯係旅遊景點既街道, 即刻駛入去睇睇, 原來係彥根城, 條街真係好古代日本FEEL, 之後又開入去城睇睇, 泊滿哂車, 走人.
開左兩個鐘就到洛北了, 荒山野嶺, 條路又窄, 唔開車都唔知點去的, 我阿媽可能會鐘意呢D地方.
雖然係荒山野嶺, 但發現有間餐廳乾乾淨淨, 入去睇下食乜, 原來係呢D煲, 甜甜地幾好食, 呢D深山既食店, 每日都唔知有無廿個客.
真正既茅屋, 起得一D都唔媽夫, 一路上發現一件事, 去日本呢類景點, 千奇唔好心急驚無位泊車, 通常一條路入去, 越早見到既停車場越貴, 越入就越平, 可惜發現得遲, 成日都笨七左.
呢間稻荷大社既供奉神明係孤狸, 佢既主題係保佑做生意興隆, 間神社就唔方唔生意興隆了...
呢度有幾千個鳥居, 每個鳥居都寫明邊個機構捐錢起的, 起都成山都係, 真係識做生意, 去左日本幾日, 第一次係度見到香港人.
下一個景點返落去洛東附近既哲學之道賞櫻, 可惜落雨, D櫻花樹好神奇, 成棵樹哂, 好似好重就斷咁, 逗留左一陣就走了, 返落祇園附近, 人氣旺好多, 搵左間鐵皮屋泊車, 之後去搵野食.
行過見到一間好得意既野, 又唔係太肚餓, 見630YEN就入去啦, 一打開MENU, O咀了...
得一款野食既餐廳, 無任何選擇, 但...的確幾好食, 個燒餅入面好足料, 有十幾款料, 熱辣辣, 聞說呢間野開左過百年, 有機會要再去.
呢個唔記得叫乜公園, 係清水寺附近, 因為清水寺我已經入過四次了, 所以唔入了, 入面好大有幾百個攤位, 係一個賞櫻場地, 但今晚落雨, 好冷清, 如果好天會幾熱鬧的, 希望七月花火大會時可以睇到呢D漫畫電影日劇先會有既熱鬧場面.
之後返大阪, 由京都唔走高速, 都係一個鐘多D, 比GPS個ETA快成個鐘, 返到酒店有D肚餓, 又開車去附近既麥記買左個洲漢堡餐, 無乜特別.
DAY 6 (天橋立, 雪)
房間望出去呢個景, 我記起了兩年前自己一個住同一間酒店, 都係呢個景, 今日係我開車以來最大考驗, 由大阪上天橋立要成三個幾鐘, 開始時落冰薄, 係車頭玻璃跳黎跳去, 開水撥都無用, 之後上山開始落雪了, 越落越大, 果時唔識驚, 跟住人地開到百二公里, 落山時仲快過頭試過半飄移, 後呔食唔實個地係咁震, 果時扭駄又死, 踩BRAKE又死, 貼住防撞欄咁去, 之後落車先知其實條路好滑的, 一跣就仆街了, 我隔離果個係度訓覺, 無影到山谷落大雪咁美麗既場面, 特別係過橋, 真係好淒美.
越過幾個山谷過左十幾條隊道同橋, 終於到了日本三景之一天橋立, 係幾得意既, 倒轉黎睇話似飛龍喎.
上到去過左一陣, 又落大雪, 好彩上面準備左好多把借, 同埋有個亭, 入面仲有暖爐, 話說之後既車站同碼頭都有D好大既燒電油既暖爐, 好貼心.
落山時坐呢D單人纜車, 佢唔會停低等你坐落去, 係一路行一路坐上去的, 反應慢D都上唔到, 張櫈居然無安全帶, 跌落去可能會死的, 又大風, 凍到震.
有人話行過對面岸, 唔好玩啦, 要行過幾鐘, 坐船過去已經好俾面了.
過左對岸後又上山, 可能大風到先頭D單人纜車唔開, 今次坐纜車了
呢邊更加荒涼, 下面D人究竟係唔係靠個景點維生的呢, 呢度令我諗起在世界中心呼喚愛既拍輯地點.
準備返過對岸開車走, 等船時忽然又落雪.
之後離開天橋立落番去神戶食牛扒, 上左國道一直都唔見油站, CHECK下GPS仲有六七十公里先有油站, 得番兩格油, 呢次仆街了, 想像下係個落雪既山谷入面無油, 前後幾十公里都無市鎮, 點算..., 我朋友為慳油連暖氣都關了, 一路開車一路凍, 終於頂到去油站, 兩格油其實應該行到一百公里的, 一出油站就行錯路, 早左出公路, 以下落黎既一段路係我開車以來遇過最難行的, 天又, 條路又無反光石, 開大燈都睇唔清楚, 又無路肩, 連防撞欄都無, 又狹窄, 一邊係石牆, 一邊係田, 我一路開都唔知會唔會有半個車呔唔食地的, 除時跌左落田, 條路仲好長, 九曲十三彎, 我諗有十公里, 一架車都無, 週圍有屋無人, 好似入左森林咁, 我想快D離開呢個鬼地方, 又趕住去食飯, 所以開得幾快, 靠直覺開車, 開左半個鐘終於返大路了, 鬆一口氣, 諗番起都驚險.
到達神戶, 五光十色, 想搵地方泊車, 發現好多人泊街, 咁我又泊啦, 搵左間唔太貴食神戶牛既餐廳, 即叫即有師父係你面前炒.
香港食既話除時要成千蚊, 呢度4000YEN就OK, 我好鐘意食奈奈用黎打乒乓既日本蒟蒻, 好彈口, D神戶牛係唔同普通牛既味, 肉味濃D, 其實食落同普通牛唔係差好遠, 試過之後都唔會再試.
之後開車返大阪, 唔行阪神高速行國道, 都係一個鐘多D就返左去了, 又慳返百幾蚊.
DAY 7 (大阪, 晴)
經過六日既大雪大雨, 開個千二公里, 我架烈火戰車都好多污漬, 租車真係好, 亂泊街邊又得, 狂用BRAKE又得, 得懶勁響下呔又得, 行水泥地,石仔地都唔驚, 唔擔心會損秏, 就算唔小心HI花左, 還車時都唔會驗屍咁驗的, 去到機場有過小插曲, 就係行李寄倉時唔記得入面有兩部租既手機要還, 於是寄左入左去又要搵返D行李出黎, 本來早到個幾鐘, 最後都係最遲上機咁滯, 百密一疏.
2010.05.15 | | コメント(0) | 牛牛の楽しい日記
